როგორ უნდა მოვიქცეთ კისრის ტკივილის დროს?

კისრის ტკივილის მრავალი მიზეზი არსებობს, ზოგიერთი მათგანი კი ჩვენ ყოველდღიურ აქტივობებს უკავშირდება. ამ პრობლემის მთავარ გამომწვევ მიზეზად დღესდღეობით, მედიკოსები კომპიუტერთან ჯდომას, ტელევიზორთან საათების გატარებას და ტელეფონში მუდმივ ყურებას მიიჩნევენ. კისრის ქრონიკული ტკივილი, დაჭიმულობისა და დაღლილობის შეგრძნება, კი ართულებს  ჩვენ ყოველდღიურ  საქმიანობას. როგორც წესი, ეს დისკომფორტი თავისთავად გადის. თუმცა, თუ კისრის ტკივილი გაგრძელდება ოთხი ან ხუთი დღის განმავლობაში და არ გაუმჯობესდება, კარგი იქნება მიმართოთ ისეთ სპეციალისტს, რომელსაც შეუძლია შეაფასოს თქვენი მდგომარეობა და დაგისვათ სწორი დიაგნოზი. ამ დროს ექიმმა შეიძლება დანიშნოს რენტგენი და/ან MRI, რათა კარგად დაათვალიეროს კისრის და ხერხემლის მალები. კისრის ტკივილის ყველაზე გავრცელებულ მიზეზებს შორისაა: 

·         კუნთის დაჭიმულობა;

·         სახსრების გაცვეთა;

·         ნერვის კომპრესია;

·        მოულდნელი ტრავმა 

კისრის ტკივილის დროს გაითვალისწინეთ ეს რჩევები და მალევე იგრძნობთ, რომ თქვენი მდგომარეობა გაუმჯობესდა:

● კისერი და თავი შეინარჩუნეთ სწორ-ნეიტრალურ  მდგომარეობაში. ეს ნიშნავს, რომ მთელი დღის განმავლობაში მოერიდოთ თავის წინ დახრას და უკან გადაწევას. 

● თუ კომპიუტერთან მუშაობა გიწევთ, მონიტორი დააყენეთ თვალების სისწორეზე. 

● წოლის დროს მოერიდეთ წიგნის კითხვას.

● ძილის დროს კი ხერხემალი სწორ მდგომარეობაში შეინარჩუნეთ და გამოიყენეთ ორთოპედიული ბალიში. 

ზოგადად კისრის ტკივილის მკურნალობა დამოკიდებულია მის გამომწვევ მიზეზებსა და სიმძიმეზე. კისრის ტკივილს ძირითადად, მედიკამენტებით მკურნალობენ. ამის გარდა, დისკომფორტის მოხსნასა და პროფილაქტიკაში დიდი მნიშვნელობა ენიჭება კისრის ვარჯიშებსა და მასაჟს. რაც შეეხება პრევენციული ღონისძიებებს-არსებობს რამდენიმე ნაბიჯი, რომელიც შეგიძლიათ გადადგათ მომავალში კისრის პრობლემების რისკის შესამცირებლად, როგორიცაა კალციუმის და D ვიტამინის დანამატების მიღება, სათანადო პოზის პრაქტიკა და სპეციალური ვარჯიშების შესრულება. გაიარეთ ეს საკითხები თქვენს პირად ექიმთან და შეარჩიეთ რომელია აქედან თქვენთვის ყველაზე სასარგებლო.